Հրանտ Զիրոյան. «Ինչո՞ւ ստեղծվեց Actual Events-ը»

Actual Events-ում միշտ կան մի քանի բանախոսներ. ի՞նչ սկզբունքով են ընտրվում նրանք, ո՞վ կարող է լինել Actual Events-ի բանախոս:

Actual Events-ի հիմնական նպատակներից մեկը ասելիք ունեցող, փորձ կուտակած մարդկանց խոսքն առավել լայն հանրությանը ներկայացնելն է: Բանախոսությունների ֆորմատը այդ նպատակին հասնելու գործիքներից մեկն է, ուստի բանախոսներ են ընտրվում պրակտիկ փորձ, գիտելիք կուտակած, ասելիք ունեցող մարդիկ: Այստեղ ընտրությունը շատ նուրբ է կատարվում, քանզի լսարանը ևս սպեցիֆիկ է: Actual Events-ին մասնակցում են իրենց ոլորտներում կայացած մասնագետներ, գործարարներ, խոշոր կազմակերպությունների ղեկավարներ, արվեստագետներ, բժիշկներ, և շատ կարևոր է ոչ միայն բանախոսի ընտրությունը, այլև բանախոսի ներկայացրած թեման: Բանախոսները հիմնականում ընտրվում են հենց Actual Events-ի մասնակիցներից, կամ նրանց կողմից երաշխավորված մարդիկ, ովքեր համապատասխանում են ընտրված ձևաչափին:

Actual Events-ը տեղի է ունենում 40-50 օրը մեկ անգամ. բացի այդ հանդիպումները էլ ի՞նչ ֆորմատներով են լինում:

Actual Events-ի մասնակիցների մեծ մասը Actual-ի գործընկերներն են տարբեր նախագծերի շրջանակներում, ուստի թե՛ գործնական, թե՛ ոչ գործնական հանդիպումների պակաս չենք ունենում: Ինչ վերաբերում է մասնակիցների միջև կապին, նշեմ, որ Actual Events-ը նաև առողջ միջավայր է ստեղծել նոր կապեր ձեռք բերելու, արդեն ունեցած կապերն ամրապնդելու և նոր գործնական հունի վրա դնելու համար: Այս կարճ ժամանակահատվածում ունեցել ենք բազմաթիվ դեպքեր, երբ մասնակիցները միմյանց հետ սկսել են աշխատել տարբեր նախագծերի շուրջ: Բացի այս, մեր գործունեությանը հետևող մարդիկ գիտեն, որ Actual Events-ը չի սահմանափակվում միայն մասնագիտական հադիպում/քննարկումներով: Պարբերաբար կազմակերպվում են ընթրիքներ, երեկոյան սուրճի կամ թեյ սեղանի շուրջ հետաքրքիր քննարկումներ և այլն:

Ի՞նչն է մոտիվացնում Actual-ի թիմին իրականացնել Actual Events-ի ֆորմատով միջոցառումներ:

Մեր թիմը նմանատիպ նախաձեռնություններ միշտ էլ ունեցել է: Actual Events-ը տարբերվում է նրանով, որ այս դեպքում որոշել ենք հանրայնացնել գործընթացը: 2014 թվականից սկսած Actual-ի թիմը իրականացնում է մեդիա հետազոտություններ ու PR ծրագրեր, որոնց արդյունքում հասկացել ենք, որ բովանդակային ասելիքը կորում է ինքնանպատակ fun-ի ահռելի հոսքերի մեջ: Հենց սա դրդեց մեզ ստեղծել մի հարթակ, որը թույլ կտա գեղեցիկ ու ժամանակակից փաթեթավորմամբ ներկայացնել իրական փորձ ու անցած ճանապարհ ունեցող մարդկանց հանրության համար օգտակար մտքերը: Եթե մեկ նախադասությամբ ձևակերպենք, Actual Events-ը ժամանակակից փաթեթավորմամբ արժեքավոր քոնթենթ տարածելու համար է ստեղծվել: