Վիգեն Չատինյան. «Անշարժ գույքի ոլորտում ֆիրմայի երկարակեցությունը վստահության նշան է»

1.Վիգեն, աշխարհը զարգանում է, թվային տեխնոլոգիաները նոր հնարավորություններ են ստեղծում բիզնեսի առաջխաղացման համար, անշարժ գույքի գործակալների ինստիտուտը շարունակու՞մ է արդյոք նույն արդյունավետությամբ աշխատել և իր տեղը չի՞ զիջում օնլայն տեխնոլոգիաներին:

Այո, աշխարհը փոխվել է, և նոր հնարավորություններ են ստեղծվել բիզնեսի առաջխաղացման համար, սակայն անշարժ գույք առնելը կամ վարձակալելը օնլայն ավիատոմս առնել չէ, այստեղ մարդիկ շահագրգռված են ուղղակի շփումներով, հանդիպումներով և քննարկումներով: Անշարժ գույքի գործակալների դերը շատ կարևոր և արդյունավետ եմ համարում:

2.Դուք ներկայացնում եք կազմակերպություն, որը քառորդ դարից ավել զբաղվում է անշարժ գույքով, չե՞ք հոգնել այդ ոլորտից:

Իհարկե ոչ, չենք հոգնել: Ավելին, այս ոլորտում երկարակեցությունը վստահության նշան է: Հանրության մեջ հայտնի խոսք կա, առավել սուտ խոսացողներին ասում են՝ կարծես թե բրոքեր լինի: Այսինքն մարդիկ կարծում են, որ հաճախ անշարժ գույքով զբաղվողները տրամադրված են իրենց խաբելու: Մենք միշտ աշխատել ենք երկարաժամկետ վստահության և բարեխղճության սկզբունքները պահպանելով և հենց դրա արդյունքում էլ կարողացել ենք դիմագրավել տարիների փորձություններին: Ի դեպ, օգտվելով առիթից կարող եմ ավելացնել, որ առաջիկայում պատրաստվում ենք հանդիսավոր կերպով նշել մեր կազմակերպության 26 ամյակը:

3.Ի՞նչ եք կարծում, կգա՞ մի օր, որ Ձեր կազմակերպությունն իր մասնագիտական ծառայությունները կառաջարկի նաև Մետավերսում:

Ինչպես ասում են, ոչինչ չի կարելի բացառել: Մարկ Ցուկերբերգի հայտնի լայվից հետո, առհասարակ, չեմ բացառում, որ մի օր բոլոր բիզնեսները գրասենյակներ կարող են ունենալ Մետավերսում: Իմ ուշադրությունից չի վրիպել նաև Դիսենթերլանդի հարթակը, որտեղ արդեն մի շարք հայտնի բրենդներ գրասենյակներ են գնել: Մեր գործունեության հենց այս փուլում դեռևս նման նպատակներ չկան, սակայն ես ուշադրությամբ հետևում եմ տեխնոլոգիական զարգացումներին, և ակտուալության դեպքում հնարավոր են նաև նման զարգացումներ:

4.Մեր հաջորդ հարցը կարելի է նախորդի շարունակությունը համարել: Ձեր կազմակերպությունը՝ ԲԱՐՍ-ը, ըստ Ձեզ որքանո՞վ է կարողանում արդյունավետ օգտագործել 21-րդ դարի տեղեկատվական հնարավորությունները՝ որպես բիզնեսի առաջխաղացման միջավայր:

Ձեր նշած հնարավորությունները գրեթե անսահմանափակ են, դրանք մեր մշտական ուշադրության կենտրոնում են, բայց բիզնեսի տեսանկյունից միշտ չէ, որ արդյունավետ է լինում այդ ամենը զուգահեռ օգտագործելը: Կախված բիզնեսի խնդրի էությունից՝ փորձում ենք հնարավորինս ինտեգրվել ժամանակակից աշխարհի ընձեռած տեխնոլոգիական գործիքներին: Կարծում եմ՝ մեզ մոտ վատ չի ստացվում, միևնույն ժամանակ չեմ բացառում, որ աշխատելու շատ տեղ ունենք:

5. 5 ֆիլմ, որոնք ըստ Ձեզ պետք է դիտեն բոլորը:

1. Լրտեսական խաղեր (Ռոբերտ Ռեդֆորդ, Բրեդ Փիթ)

2. Հայրենասերը (Մել Գիբսոն)

3. Ֆորդն ընդդեմ Ֆերրարիի

4. Ջենտլմենները (Գայ Ռիչի)

5. Մարվելի ֆիլմերը